Aigebreedler Fasnacht 2024

Basel – e haisses Pflaschter

Basel – e haisses Pflaschter
Es git e heisse Summer hür
Es geit ume wie nes Für
Ja, guete Rat isch tür
I däm heisse Summer

Mit däm Täggscht het dr Polo zwor
Jetzt scho vor 44 Joor
Vo haisse Nächt in Ziiri gsunge.
Dert kämpfe vehemänt die Junge
Fir ihri Rächt und dä bschtimmt Fall
Kennt d Schwyz as d Operekrawall!
Vyl haisser aber isch dr Summer
Im 68 – dä macht Kummer.
Europawyt goht glai und grooss
Zem Demonschtriere ab uf d Strooss.
Me will, ass in Vietnaam me jetzt
Däm schlimme Grieg en Ändi setzt.
Und au in Praag erkennt me numme,
Dr Friehlig isch im Summer umme.
Dert iberall, wie me jo waiss,
Isch doozmool s Pflaschter zimmlig haiss.

Villicht dänggsch du bim haisse Pflaschter
Au zallererscht emool an Zaschter,
Wo dir die vyle Kriminelle
In Basel scho hän klaue welle.
Villicht dänggsch aber au an d Gwalt,
Wo dir in dääre Stadt nit gfallt.
Me schloot, s git Sexual-Verbräche,
Me dylt und duet mit Mässer stäche.
Mehr Sicherhait an haisse Stelle,
Das wurde mir gärn alli welle.
Doch allewyl haisst s, s kunnt scho guet.
(Dasch jetzt nit ebbe e Versuech
Vo Wärbig fir s ney -minu-Buech!)
Wenn das no aine glaube duet!

Villicht dänggsch aber so wie mir:
S stehn haissi Zyte vor dr Diir,
Wenn mir an d Ärderwermig dängge,
Wo sich nur schwär no losst beschrängge.
Drby warnt me syt dryssig Joor
Vor dääre groosse Glymagfoor!
Nur ärnschd het das kuum ebber gnoo.
Jä nu, jetzt isch das halt esoo.
Mir mien uns drum drhindersetze
Die gschunde Wält nimm mehr z verletze.
Villicht bestoht denn ainewääg
No d Hoffnig, si wurd wider zwääg.
Nimmt d Hitz in Basel wyter zue,
Findsch niene me die neetig Rueh.
Dr bächschwarz Asphalt zieht scho Fääde,
Erhoolig findsch nur in de Lääde,
Bi dääre Hitz
Isch das kai Witz.

S isch alles staubig, grau und drogge,
Kai Ort zem gmietlig aanehogge,
Kai Blätzli het e bstimmte Raiz
Und wenn, denn nur e Gartebaiz.
S git kaini Baim, wo transchpiriere,
Esoo dien s Glyma reguliere
Und fir e bitzli Kiehli sorge.
S blybt haiss dur d Nacht bis frieh demorge.
S Bytschaama duet nass an dir glääbe,
Kai Chance zem im Draumland z schwääbe.
Du wälzisch mied di hi und här
Und s Uffstoo fallt dir schampar schwär.
Denn schwitzisch hailos nundefaane
Dr ganzi Daag so vor di aane.
Es wärde Schmeggiwasser miesse
Uns d Luft e weeneli versiesse,
Will s iberall halt nur no dampft,
Wenn dinn und duss me wytergrampft,
Bi dääre Hitz –
E schlächte Witz.

Isch s z haiss und goht s im Byro nimme,
Denn hau doch ab in Rhy go schwimme.
Du kaufsch dr aifach zue däm Zwägg
No schnäll e wasserdichte Mägg,
Losch s Home-Office disgreet verschwinde
Und duesch drfir Rhy-Office grinde!
Denn gohsch bim Schaffe häll und wach
Mit Fisch und Mägg durab dr Bach.
Bi dääre Hitz
Hilft das e bitz.

Bim Uuseko machsch di uf d Sogge -
Bisch schnäll au ohni Diechli drogge -
Und duesch di in die Freyi trolle,
Wo Sunnesäägel hängge solle.
So underwäggs, s kennt gar nyt schaade,
Driffsch jo villicht uf Nääbelschwaade,
Wo kinschtlig dur d Stadt duureniisle,
Zem unsri roote Kepf z beriisle.
Kaufsch no e kiehle Bio-Saft
Und e Salaat, denn hesch es gschafft.
Doch alles bsetzt, es isch fir d Katz,
Findsch niene me e Schatteblatz.
S grien Zimmer wär e guete Root,
Nur waiss grad niemert, wo das stoht.
Denn jeede Moonet duet das liebe
Oase-Blätzli me verschiebe.
Lothringerblatz! – Au dert, dängg dra,
Soll s Pflanzedreeg mit Bänggli ha,
Zem gmietlig kenne zämmezheggle.
Nur jetze schnäll dert aane seggle,
Bi dääre Hitz,
Das isch e Witz!

Do bringt uns au d Dreiroosebrugg
Halt s Glyma mit so Depf nit zrugg.
Y stell mr vor, wie d Lyt dert kenne
Um all die Jungbaim ummerenne,
Sich bugge, huure und verbiege,
Zem drunder e bitz Schatte z griege.
Drnääbe no en Autispuur,
Das isch denn ächt Erhoolig puur!
Mit Glaighiirscht wird d Stadt nit nit wermer,
Nur pekuniär e bitzli ermer.
D Idee, Frau Käller, isch jo nätt.
Doch mänggmool schynt s, es syg e Brätt
Vor de politisch groosse Kepf,
Wo maine, s wurde jetzt so Depf
Em Glymamonschter d Stirne biete
Und uns vor Katastrophe bhiete.
Vor dääre Hitz –
Isch das e Witz?

Dr Bligg in d Zuekumpft schynt rächt schyter,
Mr kemme z Basel ächt nit wyter.
Wenn mir au wyterhi versaage,
Denn goht s uns bald arg bees an Graage.
In achtzig Joor gäb s, sait e Heer
Vo Forscher, z Basel 8 Grad mehr
Im Jooresschnitt, dasch zimmlig haiss.
Eb d Politik e Leesig waiss?
Das isch e Witz!

Ja, guete Rat isch tür,
Süsch git s e heisse Summer hür.

D Ladäärne gseht me au in däm Joor uf em Minschterblatz, vom Mäntigoobe bis am Mittwuchmorge.