Aigebreedler Fasnacht 2023

Wär het's erfunde?
... 60 Johr gäh und näh!

Hugh, Blaichgsicht, sait dr Winnetou
Mit syne lange, schwarze Hoor.
My Hut isch root und wyss bisch du,
Doch ainewääg bisch du kai Gfohr.
Ych setz mi undrem Himmelszält
Fir Friide y und Grächtigkait
Und wintsch mir, dass uf deere Wält
Das Guet im Härz e jeede drait!

Dr Shatterhand sait, du hesch Rächt,
Ych rytt mit dir wyt dur dr Prärie.
Und goht s emool aim vo uns schlächt,
Mir hälfe uns, wänn Brieder sy.
Mir wän fir immer fir das stoh,
Wo d Wält am dringendschte mues ha…
Brrrr, halt! S ka so nimm wyter goh!
Worum? Wär isch ächt dschuld do dra?

Erfunde sin die stolze zwai
Bluetsbrieder worde vom Karl May.
Är het ganz sicher denn nit welle
Rassistisch sy und Saich verzelle.
As Lehrer schynt ihm domools wichtig
Mit Aastand z handle, fair und richtig.
Do länggt är aber rächt in d Schyssi,
Denn schynts dien hit jetzt e baar wyssi
Nit-I – das Wort darfsch nimme huuche –
Die fremd Kultuur grad stargg missbruuche.

Wenn ain mit Rasta Reggae fyrt
Und ain en Unwohlsy verspyrt,
Will ebbe dä sich dert bedient,
Wo dä, wo s gheert, nyt dra verdient,
Denn duet me däm Aa-aigne saage.
Die WOKE dien das nit verdraage
Und hän druffaabe schnäll beschlosse,
Uf Schuldigi wird ganz scharf gschosse.
Wil offe me dr Muet nit het,

Wycht me halt us ins Internet.

Isch aine gfunde, wird s rächt bitter,
S goht los mit eme Shitstorm-Gwitter.
So dien die nätte, faadegraade
Politisch Grächte uffelaade,
Was ihne grad nit basse duet
Und dausig like s, finde s guet.
Drby blybt maischtens, do verregg y,
Dr Aastand komplett uf dr Streggy.

S I-Wort darfsch ebbe nimme wähle
Und s N-Wort duet scho lang aim quääle.
Au s M-Wort muesch du glatt vergässe.
Das kasch jetzt nur no gnussvoll ässe.

Denn git s jo au no dä in Laufe,
Wo d Grytterdääfi duet verkaufe
Und uns syt Joore duet mit Frooge
«Wär het s erfunde?» ständig blooge.
Dä Wärbespruch isch wider in,
Wenn jetzt au in ganz andrem Sinn.
Was s Lääbe dir doch wott versiesse,
Kasch nimme aifach nur no gniesse.
Denn wie em Damokles sy Schwärt
Hängt d Froog im Ruum: Was isch es wärt?
Wär het s erfunde? Wo kunnt s här?
Ai, mache mir uns s Lääbe schwär!

Darf s jetze no Spaghetti gäh?
Und duet me uns d Paella näh?
Darfsch ächt dehaim no Couscous koche,
Villicht au uf e Sushi poche?
Git s indisch no oder chineesisch,
Algeerisch oder libaneesisch?
Sin gueti Gwirz us Afrika
Bi uns langfrischtig ächt no z ha?
Darf dr Lang Lang bim Fliigel spiile
No in e Mozart-Noote schiile?
Darf iberhaupt e wysse Maa
D Erlaubnis fir e Blues no haa?
Und isch s de poc, wenn si dien singe,
Erlaubt, dass si e Schlaager bringe?

Y find, die Diskussion duet doo
In e ganz falschi Richtig goh.
Duet d Mentschhait sich nit mehr zerstiggle
Mit däm, statt wyter sich z entwiggle?
Isch si nit gnau esoo entstande,
Wie wältwyt si hit isch vorhande?
Joorhundertlang duet me sich gäh
Und ebbe vonenand au näh.
In de verschiidene Kultuure
Findsch drum vo alle andre Spuure,
Denn alles, wo dr Mentsch usmacht,
Het är sich kulturell aaglacht!

Dr Darwin het sich dääglig gschunde
Und d Evoluzioon erfunde.

Dangg ihm kennt jeede hit die Grafft,
Wie das d Entwiggligsgschicht het gschafft.

Ganz sicher nit e Fremderfindig
Isch d Aigebreedler-Glygge-Grindig.
Syt 60 Joor gehn mir uf d Gass
Und hän no immer zämme Spass.
Das Joor haisst s aber nit nur fyre,
Mir wän so richtig d Fasnacht gspyre,
Coronalos und ohni Sorge
Grad bis am Donnschtig frieh demorge.

Faazit:

Worum mien mir dr Mentsch klassiere
In schwul, normal, schreeg, schwarz, gääl, root?
Worum ka me nit s Lääbe fiehre,
Wo s aifach nur um Mentsche goht?
Denn miessti me nit immer strytte,
Wär het s erfunde, wäm gheert was.
Denn wurde mir as Brieder rytte!
Y glaub ganz fescht, mir schaffe das!

HUGH!!

D Ladäärne gseht me au in däm Joor uf em Minschterblatz, vom Mäntigoobe bis am Mittwuchmorge.